बैतडी : मेलौली नगरपालिका वडा नम्बर २ ले सोमबारदेखि आफ्नै भवनबाट सेवा दिन सुरु गरेको छ ।
वडा अध्यक्ष कृष्ण दत्त भट्टले अक्षय तृतीयाको शुभ साईत पारी गणेश कलशको पुजन लगायत रुद्रीपाठ गरेर भवनको विधिवत उद्घाटन गरेका हुन ।
यस अघि सुरुदेखि भाडाको घरबाट सेवा दिईरहेको वडा कार्यालयले मेलौली २ स्थित गेरडाको नवनिर्मित भवनबाट सेवा दिन थालेपछि सेवाग्राहीलाई सहज र व्यवस्थित रूपमा सेवा प्राप्त हुने वडा अध्यक्ष भट्टले बताए।
“भाडाको संरचनामा काम गर्दा स्थानको अभाव र व्यवस्थापनमा समस्या थियो। अब आफ्नै भवन भएपछि सेवाको गुणस्तरमा सुधार आउनेछ”, उनले भने ।
चारकोठे भवन रहेको वडा कार्यालयमा अब मिटिङ हलको पनि सुबिधा रहेको उनले बताए।
स्थानीय बासिन्दाले पनि नयाँ भवन सञ्चालनमा आएकोमा खुसी व्यक्त गरेका छन्।
