बैतडी : बैतडीमा पासोमा परेको चितुवा भागेको छ । जिल्लाको दशरथचन्द नगरपालिका २ देहीमाण्डौँ कुमालीगाडबाट जंगली बँदेलका लागि थापेको पासोमा परेको चितुवा भागेको हो ।
सोमबार राति पासोमा फसेको चितुवा मंगलबार राति पासो चुँडालेर भागेको डिभिजन वन कार्यालय बैतडीका प्रमुख भरत प्रशाद भट्टले जानकारी दिए ।
पासोमा फसेको चितुवाको उद्धारका लागि शुक्लाफाँटा राष्ट्रिय निकुञ्जबाट उद्धार टोली आएको भएपनि मंगलबार रातीपछि पासो चुँडालेर चितुवा भागेको उनले बताए ।
त्यो क्षेत्र बरिपरि घाइते चितुवालाई खोजेपनि नभेटिएको डिभिजन बन कार्यालय बैतडीले जनाएको छ ।
पासोमा परी घाइते भएको चितुवाको घाँटीको भागमा चोट छ । चितुवा घाइते भएको हुनाले स्थानीयबासिन्दाहरुलाई आवश्यक सतर्कता अपनाउन आग्रह गरिएको डिभिजन वन कार्यालय बैतडीका सूचना अधिकारी मदन जोशीले बताए ।
