बैतडीको देहीमाण्डौं बजार अनुगमन, ६ हजार बढीका अखाद्य बस्तु बरामद गरि नष्ट

By सहज खबर On २०८१ मंसिर १, शनिबार १२:३६

बैतडी : बैतडीको देहीमाण्डौं बजार संयुक्त रुपमा अनुगमन गरिएको छ । बजार अनुगमन गर्दा साढे ६ हजार बराबरका म्याद नाघेका खाद्य सामग्री बरामद गरि नष्ट गरिएको छ । शुक्रबार संयुक्त बजार अनुगमन टोलीले २५ ओटा पसलहरुको अनुगमन गर्दा ६ ओटा पसलबाट ६ हजार ६३० रुपैँया बराबरका म्याद नाघेका सामान बराबद गरि नष्ट गरिएको हो ।

पेय पदार्थ बिस्कुट लगायतका खाद्यबस्तुहरु बरामद गरि नष्ट गरिएको खाद्य प्रविधि तथा गुण नियन्त्रण डिभिजन कार्यालय बैतडीका प्रमुख ललित कठायतले जानकारी दिए । जिल्ला प्रशासन कार्यालय, खाद्य प्रविधि तथा गुण नियन्त्रण डिभिजन कार्यालय, घरेलु तथा साना उद्योग कार्यालय, नेपाल प्रहरी र स्थानीय जनप्रतिनिधिहरुको सहभागितामा शुक्रबार बजार अनुगमन गरिएकोउनले बताए ।

बजार अनुगमनका क्रममा व्यापारीहरुलाई म्याद नाघेका सामग्री विक्रिवितरण नगर्न आग्रह गरिएको कठायतले बताए । पहिले लाखौं रुपैयाँ बराबरका म्याद नाघेका बस्तुहरु फेला पर्ने गरेको भएपनि पछिल्लो समय केही सुधार आएको उनले बताए ।

बजार अनुगमनलाई स्थानीय तहहरुले समेत निरन्तरता दिनुपर्नेमा कठायतले जोड दिए । यसका साथै उपभोक्ताहरुले समेत सचेत हुनुपर्ने उनले बताए ।