दार्चुलाको शैल्यशिखर नगरपालिकाका कृषि प्राविधिक अधिकृत र कृषि नायब प्राविधिक सहायकविरुद्ध नौ लाखभन्दा बढी भ्रष्टाचार मुद्दा दायर भएको छ ।
अख्तियार दुरुपयोग अनुसन्धान आयोगले कृषि प्राविधिक अधिकृत मोहन सिंह धामी र कृषि नायब प्राविधिक सहायक अशोक सिंह धामीविरुद्ध आइतबार विशेष अदालत काठमाडौँमा भ्रष्टाचार मुद्दा दायर गरेको हो ।
अख्तियारका प्रवक्ता नरहरि घिमिरेले कृषि समूहको बिल भुक्तानी गर्दा कमिसन बापत सेवाग्राहीसँग घुस माग गरिरहेको भन्ने सूचना एवम् उजुरीका आधारमा अनुसन्धान हुँदा उनीहरूले घुस लिएको पुष्टि भएको जानकारी दिनुभयो ।
उहाँका अनुसार अख्तियारको कार्यालय कञ्चनपुरबाट खटिई गएको टोलीले मोहन र अशोकले सेवाग्राहीबाट चार लाख १२ हजार रुपियाँ घुस लिइसकेको अवस्थामा उक्त रकम र अशोकको नाम काटिएको दुई लाख ५० हजार रुपियाँको दुई वटा गरी पाँच लाखको चेकसहित नियन्त्रण लिइएको हो ।
मोहन र अशोकलाई भ्रष्टाचार निवारण ऐन बमोजिमको कसुरमा बिगो नौ लाख १२ हजार रुपियाँ कायम गरी आज विशेष अदालत, काठमाडौँमा आरोपपत्र दायर गरिएको अख्तियारका प्रवक्ता घिमिरेले जानकारी दिनुभयो ।
