बैतडी : बैतडीको सुर्नया गाउँपालिकाको कार्यापालिका बैठकमा बिवाद भएको छ । कार्यपालिका बैठकमा टंङ्गोमा नै नपुगेको प्रस्ताव निर्णयपुस्तीकामा उल्लेख गरिएको भेटिएपछि बिवाद भएको हो ।
गत कार्तिक ९ गते बसेको कार्यपालिका बैठकमा कुनै छलफल नभएका ४ वटा निर्णय प्रस्ताव निर्णयपुस्तीकामा उल्लेख गरिएको भेटिएपछि विवाद भएको सुर्नया वडा नं. ८ का वडा अध्यक्ष भान बहादुर बोहराले जानकारी दिनुभयो । कार्यपालिमा नै विवाद भएपछि गाउँपालिका अध्यक्षलाई छलफल गरौं भन्दा नमानेपछि सामान्य कुर्सि तोडफोड भएको उहाँले बताउनुभयो ।
कार्यपालिकामा आएपनि टुङ्गोमा नपुगेको प्रस्ताव निर्णयपुस्तीकामा लेखिएको भेटिएपछि उक्त निर्णय लेखिएको पाना नै च्यातिएको छ । सो निर्णय के थियो भनेर खुलाइएको छैन । बुधबार बसेको कार्यपालिका बैठकमा विवाद भएपछि बिहीबार दिउँसो २ बजे सम्मका लागि स्थगित गरिएको प्रवक्ता महराले जानकारी दिनुभयो ।
यस किसिमको समस्या पटक पटक दोहोरिएको पनि प्रवक्ता महराले बताए ।
यस बिषयमा गाउँपालिका अध्यक्ष अम्मरबहादुर कुवँरले सामान्य विवाद भएको र थप छलफलका लागि बिहीबारका लागि बैठक बोलाइएको बताउनुभयो ।
